Të ndryshkur dhe në gjendje shumë të keqe janë kallashnikovët që shteti rus u jep rekrutëve të rinj. Në videot e ngarkuara nga vetë qytetarët e thirrur për të shërbyer në ushtrinë ruse, duket qartë se armët që u jepen janë në gjendje të keqe.
Dhe kjo mund të ketë qenë një nga arsyet që çuan në zëvendësimin e kreut të logjistikës ushtarake, gjeneral Dmitry Bulgakov, njoftoi Ministria e Mbrojtjes e Rusisë të shtunën mes vështirësive në furnizimin e forcave të armatosura ruse në Ukrainë. Gjenerali Dmitry Bulgakov u hoq nga posti i tij si zëvendësministër i mbrojtjes për shkak të “transferimit të tij në një pozicion tjetër”, tha ministria, pa dhënë detaje.
Zëvendësuesi i tij u shpall kolonel Mikhail Mizinçev, i cili “do të jetë përgjegjës për furnizimin logjistik të forcave të armatosura”. Kështu 60-vjeçari Mizinçev, i cili deri më tani ishte shef i Qendrës Kombëtare të Kontrollit të Mbrojtjes, do të marrë detyrën e zëvendësministrit.
Fotot dhe videot e armëve të papërshtatshme janë nga rajoni Primorye. Sipas Ministrisë ruse të Mbrojtjes, ata shtetas rusë që janë thirrur për të shërbyer si pjesë e mobilizimit të pjesshëm, në Territorin Primorsky, kanë filluar të mbërrijnë dhe njësitë dhe nën njësitë ushtarake.
Vihet re se në Vladivostok u krijua një pikë pritjeje për personelin, ku rekrutët e rinj morën uniforma ushtarake dhe pajisje mbrojtëse personale dhe më pas rekrutët e rinj do të fillojnë stërvitjet e koordinimit luftarak në objektet e stërvitjes ushtarake të njësisë.
“Jam i sigurt se ju do ta përmbushni detyrën tuaj ndaj Atdheut me nder dhe dinjitet dhe nuk do të njollosni lavdinë e forcave ruse. Unë besoj në guximin dhe aftësinë tuaj për të mbrojtur Atdheun, për të shtypur këto shpirtra fashiste”, tha Yuldashev, sipas Ministrisë së Mbrojtjes.
Megjithatë, pushtimi i Ukrainës nxori në dritë vështirësitë e rëndësishme logjistike me të cilat përballej ushtria ruse. Analistët besojnë se këto mangësi ishin një nga shkaqet e problemeve me të cilat u përballën ushtarët rusë në fillim të luftës.
“Gjatë gjithë shtatorit, Moska ka treguar se ka shumë pak trupa për të vazhduar taktikat e saj agresive, vuan nga mungesa e sistemeve të armëve të teknologjisë së lartë dhe precizitetit dhe ka dështuar në përpjekjen e saj për të kontrolluar hapësirën ajrore të Ukrainës”, sipas një raporti të New-York Times.